Turob To‘la


Post Views:
687

TUROB TO‘LA (taxallusi; familiyasi To‘laxo‘jayev, 1918.24.12–1990.20.4) –O‘zbekiston xalq shoiri (1988). O‘zbekistonda xizmat ko‘rsatgan san’at arbobi (1967). 1930 yildan Toshkentda. Toshkent teatr bilim yurtida (1934–38), Toshkent pedagogika institutining til va adabiyot fakultetida (1938–41) o‘qigan. Mehnat faoliyatini yoshlar gazetasida adabiy xodimlikdan boshlagan (1935–41). Keyinchalik radiokomitet, Respublika gazetasida, partiya idoralarida, nashriyotda, «O‘zbekfilm» kinostudiyasida va boshqa ijodiy tashkilotlarda mas’ul lavozimlarda ishlagan, Hamza teatrida direktor (1977–79), Yozuvchilar uyushmasi Toshkent viloyat bo‘limi va Adabiyotni targ‘ib etish markazida rahbar (1980–90). «She’rlar» (1939), «Tabassum» (1944), «Baxt tongotari» (1948), «Muborakbod» (1949), «Bolalar dostoni» (1950), «Qanotlan, qo‘shiqlarim» (1955), «Tanlangan asarlar» (1958), «Oromijon» (1961), «Gul­yor» (1968), «Oftob nayzada» (1974), «Suyuk momo» (1978), «Xayolim senda» (1979), «Yetti zog‘ora» (1981), «Nodirabegim» (1987) va boshqa she’r, qo‘shiq va dostonlardan iborat to‘plamlari nashr etilgan. «Qizbuloq» (1968), «Quvvai qahqaha» (1969) va boshqa pyesalar yozgan. «Maftuningman» (1958), «Furqat» (M. Melkumov bilan hamkorlikda, 1960), «Shashmaqom» kabi kinossenariylar; bir qancha qo‘shiq va kantatalar matni muallifi. Toshkentdagi ko‘chalardan biri uning nomi bilan ataladi.

«Toshkent» ensiklopediyasi. 2009 yil

Оставьте комментарий