Teshikko‘priktepa


Post Views:
5

TESHIKKO‘PRIKTEPA – 5–13-asr boshiga oid arxeologik yodgorlik; arkli, istehkomsiz manzilgoh. «Hamza» (hozirgi «Novza») metro bekati yaqinida (Bunyodkor shohko‘chasi) joylashgan. Unda 30-yillarda o‘lkashunos D.D.Bukinich bir necha marta materiallar yiqqan; 50-yillarda ToshDU arxeologiya kafedrasi kuzatishlar olib borgan. 1962 yil arxeologlar K.A.Shaxurin va Yu.F.Buryakov, 1968 yil Toshkent arxeologiya ekspeditsiyasi (M.I.Filanovich va boshqalar) tomonidan tekshirilgan. Balandligi 6 m ga yetadigan ark xarobalari qisman saqlangan. Dastlab manzilgoh xarobasining maydoni 500 x 600 m bo‘lgan. Teshikko‘priktepaning arki alohida xonalarga bo‘lingan va qalin tashqi devor bilan o‘ralgan, xom g‘isht va paxsadan qurilgan yaxlit inshootdan iborat bo‘lgan. Qal’a markaziy qismidagi binolar 5–8-asrlarga mansub. 8-asrda binolar buzilgan va yonib, vayronaga aylangan. 9–12-asrlarda tepa hududi va arkida hayot tiklangan, bu yerda aholi temirchilik, metall buyumlar tayyorlash bilan shug‘ullangan. Bu manzilgoh Choch poytaxti Binkatning atrofida joylashgan savdo-hunarmandchilik qishloqlaridan biri bo‘lgan. 13-asr boshida butunlay xarobaga aylangan.

«Toshkent» ensiklopediyasi. 2009 yil

Оставьте комментарий