Taxtapul


Post Views:
144

TAXTAPUL – Sebzor dahasidagi qadimgi mahalla. Teshikqopqa (Darvishakqopqa), Tarnovboshi, Kohota, Chilto‘g‘on mahallalari bilan chegaradosh bo‘lgan. Bir chekkasi shahar mudofaa devoriga tutashgan; shahar darvozalaridan biri – Taxtapul darvoza shu yerda bo‘lgan. Arxiv materiallariga ko‘ra, 4 qismga (1-Taxtapul, 2-Taxtapul-mo‘g‘ol, 3-Taxtapul, Yuqori Taxtapul) bo‘lingan. Ularda jami 446 kishi yashagan. 3 ta mozor (Taxtapul, Ko‘kto‘nliota, Azizlarxo‘ja) bo‘lgan. Aholisi, asosan, o‘zbeklar bo‘lib, savdo-sotiq, shahar tashqarisidagi yerlarida dehqonchilik va bog‘dorchilik bilan shug‘ullangan. Toshkentda baqqollik do‘konlari, choyxonalar, 2 tegirmon, juvozxona va boshqalar bo‘lgan (20-asr boshi).

TAXTAPUL KO‘CHASI – Shayxontohur tumanining «Taxtapul» mahallasi hududida. Shayxontohur va Fafur Fulom ko‘chalari oralig‘ida. Uzunligi 1,5 km atrofida. Ko‘cha joylashgan hudud qadimda Taxtapul deb atalgan va shaharning shu nomdagi qadimgi darvozasi ushbu ko‘cha joylashgan hududda bo‘lgan. 19-asrning 1-yarmida tashkil topgan. Dastlab Turkqo‘rg‘on nomi bilan atalgan. 1972 yil 25 aprelda teatr rejissyori Zuhur Qobulov nomi berilgan. 2008 yil 9 iyundan Taxtapul nomi bilan yuritiladi. Yo‘nalishida Gidrometeorologiya kasb-hunar kolleji, 20-maktab, 21-oilaviy poliklinika, «Pokiza» kafesi, dorixona, savdo shoxobchalari, turli servis xizmat ko‘rsatish maskanlari va shaxsiy turar joy binolari joylashgan. Tarkibida 4 tor ko‘cha bor. YAqinida Sebzor dahasi, tibbiyot kasb-hunar kolleji, «Sharshara» kafesi, «Otalar choyxonasi» bor.

«TAXTAPUL» MAHALLASI (Sebzor dahasi, Markaz-17/18, 35) – Olmazor tumanidagi mahalla. «Namuna», Chilto‘g‘on mahallalari bilan chegaradosh. 1992 yil tashkil etilgan va «Qahramon» nomi berilgan, 1997 yildan «Taxtapul» nomida. Aholisi 6830 kishi, ko‘p millatli. Mahalla hududida «At-Termiziy» masjidi, o‘rta maktab, bolalar bog‘chasi, yengil sanoat kolleji, to‘yxona mavjud.

«TAXTAPUL» MAHALLASI (Shayxontohur ko‘ch., 117a-uy) – Shayxontohur tumanidagi mahalla. Labzak, Kohota, Turkqo‘rg‘on mahallalari bilan chegaradosh. Nomi Kaykovus kanaliga qurilgan yog‘och ko‘prik bilan bog‘liq bo‘lishi mumkin. Aholisi 3550 kishi, asosan, o‘zbeklar, shuningdek, 10 dan ortiq millat vakillari yashaydi. Mahalla hududida 22 ta ko‘cha, bolalar bog‘chasi, o‘rta maktab, 2 ta kollej, bolalar yuqumli kasalxonasi, «Istiqlol» restorani va kafelar, oziq-ovqat do‘konlari joylashgan. Davlat arbobi Husnitdin Asomov, dorbozchi Erkin Toshkanboyev, Zaripovlar sulolasi, yozuvchi Adham Rahmat shu mahallada yashab o‘tgan

«Toshkent» ensiklopediyasi. 2009 yil

Оставьте комментарий