Shohmurod kotib


Post Views:
47

SHOHMUROD KOTIB, Muhammad Shoh Murod Kotib Shoh Ne’mat o‘g‘li (1850–1922.14.03) – xattot. Shayxontohur dahasidagi Zanjirlik mahallasida tug‘ilgan. Dovudxo‘ja kotibning shogirdi. Ma’lum muddat Ko‘kaldosh madrasasida tahsil olgan. Mir Ali Tabriziy, Sulton Ali Mashhadiy, Mir Ali Hiraviylarning nasta’liq, Yunusxo‘ja Shahrisabziyning shikasta xatlaridan ilhomlanib g‘azallarni kitobat qilgan. To‘quvchilarga yog‘ochdan «tig‘», «tarak» (to‘quvchilik asboblari) yasagan. Ko‘chirgan kitoblari oxiriga «Tig‘band» yoki «Shohimurod Tig‘bandiy» deb imzo qo‘ygan. Shu taxallus bilan she’rlar ham yozgan. Toshkentdagi toshbosma (litografik) matbaa korxonalarida o‘zbek va fors tilida chop etilgan Sharq adiblarining asarlarni o‘z xatida ko‘chirgan. Ular orasida Navoiy, Jomiy asarlari, shuningdek, «Devoni Bedil», «Hofiz Sheroziy», «Devoni Amiriy», «Devoni Fuzuliy» va boshqalar bor. Uning shogirdlari orasida Mulla O‘tab Rasulmuhammad o‘g‘li, Xislat, Sidqiy Xondayliqiy, Roqim va Abdulqodir Murodiy kabi yetuk xattotlar bo‘lgan.

Shohmurod kotibning 1893 yilda Toshkentda Mirali Tabriziyning husnixat haqidagi risolasi bilan birgalikda nashr qilingan «Mufradot va murakkabod va risolai xat» asari xattotlik hunari va husnixat san’atini o‘rganishda muhim qo‘llanmadir.

«Toshkent» ensiklopediyasi. 2009 yil

Оставьте комментарий