Sensiz bahorlarim kuzlanib qoldi ayrilik haqida she’r

Sensiz bahorlarim kuzlanib qoldi

Qarog‘imga sig‘mas mehr degan his,
Otash tig‘la qalbim muzlanib qoldi.
Kesishmas yo‘llarda qoldik ikkimiz,
Sensiz bahorlarim kuzlanib qoldi.

Umid-qanotlari qirqilgan qushdek,
ko‘zyoshlar dardimni aritolmaydi.
O‘n beshi qorong‘u qolgan oymi, ishq-
Ko‘ngil uylarini yoritolmaydi.

Shabnam-balki yurak to‘kayotgan yosh,
Baxtimga ne bo‘ldi ko‘zlandimi u ?
Ko‘zyoshlarda qotib qolganday quyosh,
Sen uning taftini izlamadingmi?

O‘tli tuyg‘ulardan qolgani kuldir,
Taqdir ro‘yolarga yuzlanib qoldi.
Ketma…nastarinning bo‘ylarin keltir,
Sensiz bahorlarim kuzlanib qoldi.

Оставьте комментарий