Sebzor dahasi. Jangob, Registon mahallalari


Post Views:
62

Jangob mahallasi. Eskijo‘va, G‘ishtmasjid, Xadra, Chuqurqishloq mahallalari bilan chegaradosh bo‘lgan. XVIII asrning 2-yarmida shahar 4 qismga bo‘linib ketadi. Har bir daha (Ko‘kcha, Shayxontohur, Sebzor va Beshyog‘och) alohida hokim tomonidan boshqariladigan bo‘lgan.

Muhammad Solihning “Toshkentning yangi tarixi” nomli asarida keltirilishicha, chorhokimlik davrining so‘nggi yillarida Shayxontohur dahasida Yunusxo‘ja, Beshyog‘och dahasida Doniyorxo‘ja, Ko‘kcha dahasida Isoqxo‘ja va Sebzor dahasida Shoxbek (Shobek) lar hokimlik qilishgan.

Daha hokimlari muhim masalalarni, ayniqsa tashqi dushman xavfini birgalashib xal qilganlar. Ammo hokimlarning o‘zaro nizolari ko‘chayib, ko‘pincha to‘qnashuvlarga sabab bo‘lardi. Bunday paytlarda shahar markazidan oqib o‘tadigan Labzak suvining ikki tarafi jang maydoniga aylanardi. Hozirgi Abdulla Qodiriy nomli istirohat bog‘idan oqib o‘tadigan Labzak suvi Jangob, suvning ikki tomonidagi maydon esa “Janggoh”, ya’ni jang maydoni nomi bilan shuhrat topgandi.

O‘zaro janglarga shahar aholisi ham jalb qilinardi. Faqat Chorsu bozori betaraf hisoblanib, janglar vaqtida ham savdo-sotiq davom etardi. Tarixiy manbalarda qayd qilinishicha, 1613 yil¬da Buxoro xoni Imomqul qo‘zg‘olon ko‘targan shahar aholisidan ana shu joyda qonli o‘ch olgan. 1847 yilda bu yerda yana katta jang bo‘lib o‘tadi. Qo‘qon xonining noibi Aziz parvonachining aholiga nohaq soliq solishi ko‘zg‘olonga sabab bo‘lgan.

Mahalla va ariqning Janggoh va Jangob deb nomlanishi 1784 yilda Shayxontohur dahasi hokimi Yunusxo‘ja tomonidan yakka hokimlikni qo‘lga kiritishda bo‘lgan hal qiluvchi jang sabab bo‘lgan.

1932 yilda Janggoh yalangligi o‘rnida (14 gektar maydonda) Eski shaharda birinchi istirohat bog‘i barpo qilinadi. Boqqa garchi, dastlab Akmal Ikromov, keyinchalik A.S.Pushkin nomi berilgan bo‘lsa ham uzoq yillar xalq og‘zida Jangob bo‘lib qolaverdi. Hozir madaniyat va istrohat bog‘i Abdulla Qodiriy nomi bilan ataladi.

Registon mahallasi. Chorsu bozorining Sebzor dahasi hududidagi dastlabki mahallalaridan biri bo‘lgan. Mahalla sifatida IX asrda vujudga kelgan. Juvaxona, Janggoh, Gulbozor kabi mahallalari va Chorsu bozori bilan chegaradosh bo‘lgan. Jangob arig‘ining hozirgi bozor markazidan o‘tadigan joylar pastliklardan iborat bo‘lganligi uchun suv toshqinlari bu yerlarni qumlok va toshloqqa aylantirgan. Qumloq so‘zi forsiyda registon ma’nosini anglatadi. Mahallaning nomi shundan.

O‘tgan asrning 40-yillarida bu mahalla aholisi ko‘chirilib, o‘rnida Spartak stadioni qurilgan. O‘tgan asrning 60 yillaridan stadionning bir qismi bozor tarkibiga qo‘shilib ketadi, qolgan qismida hozirda shahar yo‘lovchi transportlarining shoxbekati joyiga aylantirilgan.

Abdulaziz Muhammadkarimov
“Toshkentnoma”. 2009 yil

Оставьте комментарий