Pargush


Post Views:
88

PARGUSH, Barkush – o‘rta asrlarda Choch shaharlaridan biri (1–12-asrlar). Arab geograflari asarlarida poytaxtdan sharqda, tog‘li tumanlarga boruvchi yo‘lda joylashgan shaharlar ro‘yxatida qayd etilgan. Xarobalari (Pargostepa) Toshkent viloyati YUqori Chirchiq tumanidagi Pargos qishlog‘i chekkasida joylashgan. Dastlab (1935) V.D.Jukov tadqiq etgan, so‘ngra D.D.Bukinich (1937), M.Ye.Masson (1961), Yu.F.Buryakov va F.Dadaboyev (1964–66) o‘rganishgan. Maydoni 15 gektar, aylana shakldagi ark (maydoni 1 gektar, balandligi 7 m) atrofi xandaq bilan o‘ralgan; shimol tarafdan to‘g‘ri burchak tarhli shahriston (14 gektar) tutashgan, uning ko‘p qismi ekinzorlar tufayli vayron bo‘lgan. Arkdagi madaniy qatlam qalinligi 7 m, shahristondagisi 1–1,5 m ni tashkil etib, paxsa va xom g‘ishtdan ishlangan mudofaa devori, turar joy, xo‘jalik inshootlari qoldiqlari moddiy madaniyat ashyolarini o‘z ichiga oladi. Madaniy qatlamlarda – sirlangan sopol idishlar, rang-barang, naqshinkor sopol buyumlar uchraydi. Hududi 15 gektarga yetgan va u kichik shaharchaga aylangan. Mo‘g‘ullar istilosidan (13-asr boshi) so‘ng, 14–17-asrlarda hayot jonlangan va 18-asrda Pargos qishlog‘i vujudga kelgan.

«Toshkent» ensiklopediyasi. 2009 yil

Оставьте комментарий