Oqsaroy


Post Views:
278

OQSAROY – Toshkentdagi zamonaviy me’moriy inshoot; O‘zbekiston Respublikasi Prezidentining qarorgohi. Binoning me’mori A.Toxtayev. Oqsaroy Yugoslaviya (hozirgi Serbiya va Chernogoriya)ning «Energoproyekt visokogradnya Xolding» kompaniyasi bilan hamkorlikda 6 oyda bunyod etilgan (1999). Maydoni 5460 kv.m. Qabulxona (tantanali kirish qismi)da mehmonlar qabul qilinib, o‘zaro muzokaralar olib boriladi. Majlislar zali, dam olish va xizmatchilar xonalari hamda qo‘shimcha xonalar mavjud. Xonalar turlicha loyihalashtirilganiga qaramay, ixcham va bir-biri bilan hamohangdir. Oddiy geometrik shakllardan tashkil topgan bino tarzi juda hashamatli ko‘rinadi. Peshtoqi mayda ravoqchali, ustunli, 2 qanotli galereyali, o‘rtasi rotonda shaklida. Oppoq ko‘rkam va mahobatli ko‘rinishga ega. Sathi katta o‘lchamdagi tosh bo‘laklari bilan qoplangan. Intereri yuqori sifatli materiallar bilan jihozlangan. Qabulxonaning oq va zangori marmarli pol sathi yarqiragan baland shipi bilan uyg‘unlashgan. Tabiiy qurilish materiallaridan mahorat bilan sayqallangan. Atrofi manzarali daraxt, gulzor va favvoralar bilan bezatilib, ko‘kat chimlar yotqizilgan, shamchiroqlar o‘rnatilgan.

«Toshkent» ensiklopediyasi. 2009 yil

Оставьте комментарий