Niyozbek yo‘li ko‘chasi


Post Views:
816

NIYOZBEK YO‘LI KO‘CHASI – Yunusobod tumanining «Turon» mahallasi, Mirzo Ulug‘bek tumanining «Amir Temur» mahallasi hududida joylashgan. Toshkentning qadimgi ko‘chalaridan biri. Amir Temur shohko‘chasi va Qori-Niyoziy ko‘chasi oralig‘ida. Uzunligi 1,5 km atrofida. 19-asrning 2-yarmida tashkil topgan. Shaharning Qashqar (Oqqo‘rg‘on) darvozasidan boshlanuvchi qadimiy karvon yo‘li o‘rnida vujudga kelgan. O‘rta asrlarda Xoja Ahrorning vaqf yerlariga qarashli bo‘lgan Oqqo‘rg‘on qishlog‘ining janubiy chekkasidan o‘tgan. Dastlab shahar tashqarisidagi Niyozbek qal’asiga olib boriladigan asosiy yo‘l bo‘lgani uchun Niyozbek ko‘chasi nomi bilan yuritilgan. 1864 yil 15 oktyabrda general M.G.Chernyayev boshliq chor Rossiyasi qo‘shinlari Toshkentga birinchi marta Niyozbek yo‘li orqali yaqinlashib, shaharning Qashqar darvozasiga hujum qilgan va mag‘lubiyatga uchrab, Chimkentga chekingan. 1865 yil 29 aprelda Chernyayev qo‘shinlari Toshkentni zabt etish uchun asosiy istehkom hisoblangan va Toshkentdan 27 km uzoqlikda joylashgan Niyozbek qal’asini qo‘lga kiritgan. 9 may kuni Niyozbek yo‘lining Darxonotasoy va Salor arig‘i bilan kesishgan joyda Chernyayev qo‘shinlari bilan Qo‘qon xonligi lashkarbegi Alimqul qo‘mondonligidagi 7000 nafar Toshkent mudofaachilari o‘rtasida qattiq jang bo‘lib o‘tgan. Alimqul og‘ir yaralanib halok bo‘lgan. 1993 yil 30 iyunda joyning tarixiy nomi sifatida Niyozbek yo‘li nomi berilgan. Yo‘nalishida shaxsiy turar joy binolari, «O‘zkommunxizmat» va «Madad» agentliklari, «O‘zkommunloyiha» instituti, Toshkent moliya instituti fakulteti, Toshkent irrigatsiya va melioratsiya instituti, savdo majmualari, xorijiy kompaniyalar, «Minor» metro bekati, 43-maktab, Yunusobod tuman prokuraturasi bor. Ko‘chadan Oqqo‘rg‘on arig‘i o‘tgan. Yaqinida Qirg‘izistonning O‘zbekiston Respublikasidagi elchixonasi, Kardiologiya markazi, Oloy bozori, Hamid Olimjon maydoni, Sergey Yesenin muzeyi, «Turon» restorani, Yunusobod tuman ijtimoiy ta’minot bo‘limi, firma va kompaniya ofislari, turli servis xizmat ko‘rsatish maskanlari joylashgan.

«Toshkent» ensiklopediyasi. 2009 yil

Оставьте комментарий