Mannop tabib


Post Views:
227

MANNOP TABIB (Abdumannop Abdunabiyev) (1867–1950) – tabib. Toshkent shahrining Sebzor dahasidagi Xo‘jatarashkan mahallasida tabib oilasida tug‘ilgan. Otasi – Abdunabi, bobolari Abdullajon va Mahamadrajab ham tabib bo‘lgan. Mannop tabib 1930–40-yillarda Toshkent aholisi o‘rtasida mashhur bo‘lgan va ko‘plab bemorlarni davolagan. U xafaqon, bezgak hamda qorin, bosh, quloq, ko‘z og‘riqlari, oyoq-qo‘l chiqishi, sinishi, yara-chaqa kasalliklari va boshqa xastaliklar bilan murojaat etgan bemorlarga shifo baxsh etgan. Ko‘p dardga davo topa olgani uchun el o‘rtasida mashhur bo‘lgan. Bemorlarni davolashda o‘z usuli bilan tayyorlangan dori-darmonlardan foydalangan. Mannop tabib bemorlarni xalq tabobati usulida davolayotganligidan xabar topgan mashhur terapevt, ToshTI prof. M.I.Slonim (1875–1945) Mannop tabib bilan uchrashgan va undan kuydirgi kasalligini davolash bo‘yicha maslahatlari olgan. Mannop tabib vrachlar bilan bo‘lgan munozara va tortishuvlarda ekzema-maraz, qichima-qo‘tir, sariq kasal, bod, rak-qiltomoq va boshqa kasalliklarni xalq tabobati usullaridan foydalanib davolash haqida so‘zlab bergan. Yozuvchi Mavlon Ikrom esdaliklariga ko‘ra, Mannop tabib osteoporoz (suyak bo‘shashishi) va boshqa xastaliklarni davolaganligi uchun unga davlat tomonidan patent berilgan va bemorlarni erkin davolashga ruxsat etilgan. Habibulla Qodiriyning «Otamdan xotira» kitobida bayon qilinishicha, Mannop tabib o‘sha davrdagi ko‘p yozuvchi va shoirlar, ziyolilar, jumladan Abdulla Qodiriy bilan yaqin munosabatda bo‘lgan. Mannop tabib haqida xalq o‘rtasida turli rivoyatlar mavjud. Tabibning nevarasi, teri-tanosil kasalliklari bo‘yicha tibbiyot fanlari doktori Abdushukur Mannonov bobosi kasbini egallab, bemorlarga shifo baxsh etib kelmoqda. Mannop tabib Zaxariq qabristoniga dafn etilgan.

«Toshkent» ensiklopediyasi. 2009 yil

Оставьте комментарий