“Botanika” ilmiy-ishlab chiqarish markazi


Post Views:
263

«BOTANIKA» ILMIY-ISHLAB CHIQARISH MARKAZI, O‘zbekiston Respublikasi FA «Botanika» ilmiy-ishlab chiqarish markazi (Do‘rmon yo‘li ko‘chasi, 32) – 1940 yil Botanika instituti nomi bilan tashkil etilgan. 1941 yildan Botanika va tuproqshunoslik instituti deb nomlangan. 1950 yildan mustaqil Botanika instituti. 1998 yil institutga Botanika bog‘i qo‘shilgach, Botanika instituti va botanika bog‘i deb ataldi. 2001 yildan hozirgi nomda. Institutda tabiiy sharoitda o‘sadigan o‘simliklar dunyosi har tomonlama o‘rganilib, muhofaza qilish, qayta tiklash, ulardan oqilona foydalanish, o‘simliklar introduksiyasi biotexnologiyasi, o‘simliklar qoplami, ekologiya, tabiatni muhofaza qilish, paleobotanika, o‘simliklar xomashyosi, anatomiyasi, sitoembriologiyasi, Orol dengizi atrofidagi qurib qolgan yerlarni qayta o‘zlashtirish, chorva mollari uchun yem-xashak bazasini tashkil etish, ekologik xaritalar tuzish va boshqalar ustida ilmiy tekshirishlar olib boriladi. Institutda 6 jildli «O‘zbekiston florasi», 10 jildli «O‘rta Osiyo o‘simliklari aniqlagichi», «O‘zbekiston Qizil kitobi» kabi 120 dan ziyod monografiya va to‘plamlar tayyorlangan. Tarkibida Botanika instituti (12 laboratiya bilan), F.N.Rusanov nomidagi Botanika bog‘i, Markaziy gerbariy (1,4 mln.dan ziyod o‘simlik nusxalari saqlanadi) bor. Markazda aspirantura, doktorantura, ixtisoslashtirilgan ilmiy kengash faoliyat ko‘rsatadi. Markazda 165 ilmiy xodim, jumladan 1 akademik, 15 fan doktori va 26 fan nomzodi ishlaydi.

«Toshkent» ensiklopediyasi. 2009 yil

Оставьте комментарий